I månadskiftet august-september var det opningshelg på Vågen bedehus. Generalsekretæren i ImF, Erik Furnes, var med som talar heile helga. Han snakka om kristent fellesskap og forsamling. Denne helga var óg starten for Vågen bedehusforsamling.
Erik Furnes. Foto: ImF Media
På laurdagen var det m.a. ei temasamling om nystarta forsamling. Leiar i interimstyret, Torleiv Åreskjold, informerte om planar og arbeid i styret, og me fekk snakka saman om vegen vidare. Erik Furnes gav gode råd på vegen. Me vil prøva å få på plass tenestegrupper som kan ha ansvar for ulike oppgåver i forsamlinga, og då håpar me at flest mogleg vil vera med. Det er bruk for alle, og ein treng ikkje binda seg for lang tid.
70 store og små er innmelde som medlemmar i Vågen bedehusforsamling til nå, og mange av desse har ført opp oppgåver dei kan bli spurt om å vera med i. Dette ser styret på som ein svært god start.
-Det kjennest godt å vera i gang! Me håpar og trur at fellesskapet på bedehuset vil få eit løft gjennom den nye forsamlinga, seier leiar Torleiv Åreskjold.
Her er ei lenke til bibeltimepresentasjonane frå opningshelga:
https://www.imf.no/2019/08/27/bibeltimer-fra-2-tessalonikerbrev/