1. mai blei «Vågen bedehusforsamling» stifta på Vågen bedehus i Ølensvåg. Forsamlinga er tilslutta Indremisjonsforbundet (ImF) og Norsk Luthersk Misjonssamband (NLM), og blir formelt ein av brukarane av bedehuset.
Etablering av «forsamling» i Ølensvåg er eigentleg historisk, sjølv om mykje vil halde fram som før. Den største endringa i praksis vil truleg bli ein meir fast og heilskapleg møtestruktur på bedehuset, og at bedehusstyret kan konsentrere seg meir om å drifte sjølve bygget (og å planlegge nytt bygg). «Vågen bedehusforsamling» vil nå stå for planlegging og koordinering av møte og samlingar. Ulike organisasjonar og lag vil kunne bruke bedehuset som før.
Ny organisering
Mange har hatt eit ynskje om ny organisering av arbeidet på Vågen bedehus. Nokre av dei kristne organisasjonane har i seinare tid redusert antalet møte, og bedehusstyret har fått meir og meir ansvar for møteplanlegging, i tillegg til å drifta sjølve bygget. Årsmøtet for bedehuset vedtok i januar å endre dette, og det har vore ein prosess i over eit år der ulike modellar og vedtekter har vore vurdert, før det blei innkalt til stiftingsmøte der eit interimstyre blei valt av 28 frammøtte stiftarar.
Faste søndagsmøte
Forsamlinga ynskjer blant anna å leggje opp til faste søndagsmøte kl. 11 annan kvar søndag den veka det ikkje er søndagsskule. Vågen søndagsskule har stor oppslutning, og er viktig å satse på. Det er eit forholdsvis stort arbeid på Vågen bedehus, med samlingar og lag for alle aldersgrupper, alt på frivillig basis. På møte søndag føremiddag er det ofte over 50 personar til stades. Familiar kjem gjerne samla, så det blir god spreiing i alder. Det har vore både dåp, nattverd og konfirmasjon på bedehuset i fleire år, men då mest i regi av NLM ved Ølen misjonslag. Nå vil dette misjonslaget gå inn i Vågen bedehusforsamling og bli ein del av forsamlingsarbeidet.
Ønskje om å vidareutvikle
Bakgrunnen for stiftinga av Vågen bedehusforsamling er eit ønskje om å vidareutvikle forsamlinga som eit ope og inkluderande fellesskap for flest mogleg. Bedehuset har i over 100 år hatt stor betydning for bygda, og forsamlinga ønskjer at generasjonane i framtida óg skal ha tilbod om eit godt kristent fellesskap der folk føler seg heime. Vi ønskjer at menneske skal kome til tru og bli styrka til teneste og at forsamlinga kan vere til velsigning for bygda og området elles.
Medlemskap
Medlemskap i Vågen bedehusforsamling kan teiknast av alle som vedkjenner seg til den kristne trua og som vil vere med og fremje formålet til forsamlinga, heilt uavhengig av kva trussamfunn ein tilhøyrer. Om ein er medlem av Den norske Kyrkja, Frikyrkja eller t.d. ImF/NLM Trossamfunn har ikkje noko å seie.
Interimstyret består av Torleiv Åreskjold (leiar), Håvard Brekkå (nestleiar), Gurine Fosse (referent) , Gunn Karin Sunnhordvik, Andreas Fosse og Gunnstein Koch (1. vararepr. og økonomiansvarlig).
03.06.2019
Interimstyret i Vågen bedehusforsamling